Entertainment: ଅସିତ୍ ପତି, ଏହିସବୁ କାରଣ ପାଇଁ ଓଡିଆ ଫିଲ୍ମର ଭବିଷ୍ୟତ ଅନ୍ଧାର’’
ଓଡିଆ ସିନେ ଜଗତରେ ଅନେକ କଳାକାର ନିଜର ଜୀବନକୁ ଉତ୍ସର୍ଗ କରିଛନ୍ତି । କଳାପାଇଁ ନିଜର ସାରା ଜୀବନ ଦେଇ ନିଷ୍ଠାର ସହ କାମ କରୁଥିବା ଅନେକ ଲୋକ ଓଡିଶାରେ ଅଛନ୍ତି । କିନ୍ତୁ ଓଡିଶାର ସିନେମା ଦୁନିଆ କାହିଁକି ବୁଡିବାରେ ଲାଗିଛି ? କାହିଁକି ଆମ ଓଡିଶାର ଚଳଚିତ୍ରକୁ ଓଡିଆ ଲୋକମାନେ ପସନ୍ଦ କରୁନାହାନ୍ତି ? ଏତେ ମହାନ କଳାକାର ଥାଇ ବି ଓଡିଶାର ସିନେମାର ଭବିଷ୍ୟତ କେଉଁଠି ? ଏସବୁ କଥା ଆଜିର ସମୟରେ ଏକ ବଡ ପ୍ରଶ୍ନ । ତେବେ ଏହି ପ୍ରଶ୍ନର ଉତ୍ତର ଖୋଜିବା ପ।ଇଁ ଆମେ ଓଡିଆ ସିନେ ଜଗତର ଜଣେ ଜଣାଶୁଣା ଅଭିନେତା ଓ ନିର୍ଦ୍ଧେଶକ ତଥା ପ୍ରଯୋଜକ ଅସିତ୍ ପତିଙ୍କ ସହ ଆଲୋଚନା କରିଲୁ । ତାଙ୍କ ଜୀବନର କାହାଣୀ , ସିନେମାରେ ତାଙ୍କର ଯାତ୍ରା, ଓଡିଆ ଫିଲ୍ମର ଭବିଷ୍ୟତ ଏସବୁ ବିଷୟରେ ମଧ୍ୟ ଜାଣିଲୁ । ତେବେ ଚାଲନ୍ତୁ ନଜର ପକାଇବା ଅସିତ୍ ପତିଙ୍କ ମତାମତ ଉପରେ ।
ଓଡ଼ିଆ ସିନେ ଦୁନିଆକୁ ଅସିତ୍ ପତି କଣ ହେବାକୁ ଆସିଥିଲେ ଅଭିନେତା, ନିର୍ଦ୍ଧେଶକ ନା ପ୍ରଯୋଜକ?
ଉ- “ମୁଁ ସବୁ ଅଭିନେତାଙ୍କ ଠାରୁ ଭିନ୍ନ, ଜୀବନରେ ନା ମୁଁ ଯାତ୍ରା ଦେଖିଛି ଆଉ ନାହିଁ ଡ୍ରାମା । ମୁଁ ସିନେ ଦୁନିଆକୁ କିଛି ହେବାକୁ ଆସିନଥିଲି । ଅଭିନୟ ମଧ୍ୟ ଜାଣିନଥିଲି, ନଜାଣିକି ମୁଁ ଫିଲ୍ମରେ ପ୍ରଥମେ ଅଭିନୟ କରିଥିଲି” ।
କାହାକୁ ଆପଣ ନିଜର ଗୁରୁ ଭାବି ଅଭିନୟ ଲାଇନ୍କୁ ଆସିଥିଲେ?
ଉ- “ଅଭିନୟ ନଜାଣି ମଧ୍ୟ ମତେ ପ୍ରଥମ ଫିଲ୍ମ କରିବାର ସୁଯୋଗ ଦେଇଥିଲେ ଉତ୍ତମ ମହାନ୍ତି ଏବଂ ନିର୍ଦ୍ଧେଶକ କୁମାର ଆନନ୍ଦ । ଆପଣ ଜାଣିକି ଆଶ୍ଚର୍ଯ୍ୟ ହେବେ କି ସମସ୍ତେ ଅଭିନୟ ଶିଖିକି ଏହି ଦୁନିଆକୁ ଆସନ୍ତି । କିନ୍ତୁ ମୁଁ ଗୋଟିଏ ଫିଲ୍ମରେ ଅଭିନୟ କରି ସାରିବା ପରେ ବିଜୟ ମହାନ୍ତିଙ୍କ ଠାରୁ ଡ୍ରାମ ଶିଖିଲି ଓ ଟ୍ରେନିଂ ପରେ ମୁଁ ପୁଣି ସିନେମା କରିବା ଆରମ୍ଭ କଲି” ।
ଅଭିନୟ ଆସିବା ପୂର୍ବରୁ ଅସିତ୍ ପତି କଣ ହେବାକୁ ଚାହୁଁଥିଲେ?
ଉ- ବହୁତ କମ୍ ଲୋକ ଜାଣିଥିବେ ଏହି କଥା ଟି । “ପିଲା ବେଳୁ ମୁଁ ଫୁଟବଲ ଖେଳିବାକୁ ବହୁତ ପସନ୍ଦ କରୁଥିଲି । ଖାଲି ଖେଳିବା ପାଇଁ ଖେଳୁ ନଥିଲି, ମୁଁ ଓଡ଼ିଶା ପାଇଁ ମଧ୍ୟ ଖେଳିଛି, “ସନ୍ତୋଷ ଟ୍ରଫି”, “ଡୁରାଣ୍ଡ କପ୍”, “ସତ୍ୟବ୍ରତ କପ୍”ମଧ୍ୟ ପାଇଛି । ଓଡ଼ିଶା ପାଇଁ ଗୋଟିଏ ଭଲ ଖେଳାଳି ଥିଲି । ଫୁଟବଲ ବ୍ୟତୀତ ୪ବର୍ଷ ବାଟ୍ମିଟନ୍ ମୁଁ ଖେଳିଛି ଓ ଚାମ୍ପିୟନ୍ ମଧ୍ୟ ଥିଲି” । ଖେଳ ପଡ଼ିଆରୁ କେମିତି ଖଳ ଦୁନିଆକୁ ପଳେଇଲି ତାହା ମୁଁ ବି ଜାଣିନି ।
ଆଜିକାଲି ଓଡ଼ିଆ ଫିଲ୍ମକୁ କାହିଁକି କେହି ଦେଖୁନାହାଁନ୍ତି? ଆପଣଙ୍କ ମତରେ କ’ଣ?
ଉ- ଭଲ ପ୍ରଶ୍ନଟିଏ ପଚାରିଲେ କାରଣ ଏହି କଥା ଟି ସମସ୍ତେ ଜାଣିବା ଦରକାର । “ଭଲ ଫିଲ୍ମ ତିଆରି ହେଉଛି, କିନ୍ତୁ ସେହି ଭଲ ଫିଲ୍ମକୁ ସାଉଥ, ବେଙ୍ଗୋଲି କିମ୍ବା ହିନ୍ଦୀ ଫିଲ୍ମରୁ ଆଣିକି କରାଯାଉଛି” । ଯାହାକୁ ମୋବାଇଲରେ ହେଉ କିମ୍ବା ଟିଭିରେ ଆଜିକାଲିର ପିଲା ମାନେ ଦେଖିଥାଉଛନ୍ତି । ଯେଉଁକାରଣରୁ ଓଡ଼ିଆ ଫିଲ୍ମ ଦେଖିଲା ମାନେ ସେମାନେ ଭାବନ୍ତି କି ଏହି ଫିଲ୍ମ ଆମେ ପୂର୍ବରୁ ଦେଖିଛୁ ତ ପୁଣି କାହିଁକି ଓଡ଼ିଆରେ ଦେଖିବୁ । କିନ୍ତୁ ଏଭଳି ସ୍ଥିତିରେ “ଆମ ଇଣ୍ଡଷ୍ଟ୍ରି ଯଦି କୌଣସି ମୌଳିକ କାହାଣୀ କିମ୍ବା କୌଣସି ଘଟଣା ଉପରେ ଫିଲ୍ମଟି ତିଆରି କରିବ ତେବେ ଲୋକ ମାନେ ନିଶ୍ଚୟ ଆଗ୍ରହୀ ହେବେ” ।
ଓଡ଼ିଶାର ପ୍ରେକ୍ଷାଳୟରେ ଓଡ଼ିଆ ଫିଲ୍ମକୁ ହିଁ ସ୍ଥାନ ନମିଳିବାର କାରଣ କଣ?
ଉ- “ଓଡ଼ିଶାରେ ପ୍ରେକ୍ଷାଳୟର ଉଚିତ୍ ବ୍ୟବସ୍ଥା ନାହିଁ । ହଲ୍ ଗୁଡିକ ଏବେ ବନ୍ଦ ହେଇଯାଇଛି ଆଉ ଯେଉଁ ହଲ୍ ଗୁଡ଼ିକ ଖୋଲିଛି ତାହା ଚାଲୁ ନାହିଁ” । ଯଦି ପ୍ରତ୍ୟେକ ଗାଁରେ, ବ୍ଲକରେ ସିନେମା ହଲ୍ ହୁଅନ୍ତା ତେବେ ମୁଁ ଭାବୁଛି କି ଖାଲି ଯୁବପିଢ଼ି କାହିଁକି ମହିଳା, ପୁରୁଷ ସମସ୍ତେ ଯାଇ ଫିଲ୍ମକୁ ଉପଭୋଗ କରିପାରନ୍ତେ । “କୌଣସି ବି ପ୍ରେକ୍ଷାଳୟରେ ଓଡ଼ିଆ ଫିଲ୍ମ ଚାଲୁ ନାହିଁ । ଏହି ଭଳି କ୍ଷେତ୍ରରେ ସାଉଥ, ବେଙ୍ଗୋଲି କିମ୍ବା ହିନ୍ଦୀ ଫିଲ୍ମ ଭଲ ଚାଲୁଛି । କାରଣ ସେହି ସିନେମାରେ ବହୁତ୍ ଟଙ୍କା ଖର୍ଚ୍ଚ ହେଉଛି, ଆଉ ସେହି ଫିଲ୍ମର କେବଳ ଫାଇଟ୍ ସିନ୍ରେ ଯେତିକି ଟଙ୍କା ଖର୍ଚ୍ଚ ହେଉଛି ସେତିକି ଟଙ୍କାରେ ଗୋଟିଏ ଓଡ଼ିଆ ଫିଲ୍ମ ତିଆରି ହେଇଯାଉଛି । ଯଦି କେଉଁ ପ୍ରଯୋଜକ ଅଧିକ ଟଙ୍କା ଖର୍ଚ୍ଚ କରି ଗୋଟିଏ ଫିଲ୍ମ ତିଆରି ବି କରିଦେଲା ତଥାପି ତାହା ଚାଲୁ ନାହିଁ । କିନ୍ତୁ ଆମକୁ ସେତିକି ସାହାର୍ଯ୍ୟ ମିଳିପାରୁ ନାହିଁ କି ଆମେ ଗୋଟିଏ ଭଲ ଫିଲ୍ମ କରି ଲୋକଲୋଚନଙ୍କ ସମ୍ମୁଖକୁ ଆଣିପାରିବୁ । ”
You may also like
ଆପଣଙ୍କ ଭଳିଆ ବହୁତ ଜଣ ଅଭିନୟରେ ନିଜର କ୍ୟାରିୟର କରିବାକୁ ଚାହାଁନ୍ତି,ସେମାନଙ୍କୁ କଣ କହିବେ?
ଉ-ସେମାନଙ୍କୁ କହିବି କି କଷ୍ଟ କଲେ କୃଷ୍ଣ ମିଳିବେ । ପରିଶ୍ରମ କଲେ ନିହାତି ଏହି ସିନେ ଦୁନିଆରେ ଆସିପାରିବେ । ଆମ ଯୁଗରେ ଏହା ଟିକେ କଷ୍ଟ ଥିଲା କିନ୍ତୁ ଏବେ ବହୁତ ସହଜ । “ସେମାନେ ଆସିକି ଅଭିନୟ କ୍ଷେତ୍ରରେ ନିଜର ନା’ କରିବା ସହ ଭଲ ଟଙ୍କା ମଧ୍ୟ ରୋଜଗାର କରିପାରିବେ । କାରଣ ଫିଲ୍ମ ଚାଲୁନି ସତ କିନ୍ତୁ ସିରିଏଲ ବହୁତ ଭଲ ଚାଲୁଛି, ନୂଆ ଚେହେରାକୁ ଲୋକ ଆପଣାଉଛନ୍ତି, ଏବଂ ସେମାନେ ମଧ୍ୟ ଭଲ ଅଭିନୟ କରୁଛନ୍ତି” ।
ଓଡ଼ିଆ ଫିଲ୍ମର ଭବିଷ୍ୟତକୁ ନେଇ ଅସିତ୍ ପତି କଣ ଭାବିଛନ୍ତି ?
ଉ- “ସରକାରଙ୍କ ସାହାର୍ଯ୍ୟ ଦ୍ୱାରା ଯାହାକିଛି ହେଇପାରିବ । କାରଣ ଦର୍ଶକ ଆଗଭଳି ଓଡ଼ିଆ ପିଲ୍ମ ଦେଖିବାକୁ ପସନ୍ଦ କରିବେ ସେତେବେଳେ ଯେତେବେଳେ ଆମେ ଭଲ ବଜେଟ୍ ନେଇକି ଗୋଟେ ଭଲ ଫିଲ୍ମ ତିଆରି କରିବା” । କାରଣ ମୋର ଗୋଟିଏ ଫିଲ୍ମ ଆସିଥିଲା “ଜଗା ହାତରେ ପଘା” ଯେଉଁ ଫିଲ୍ମଟି ଏତେ ଲୋକଙ୍କୁ ଭଲ ଲାଗିଥିଲା ଯେ ସିନେମାଟିକୁ ଦେଖିବାକୁ ଶଗଡ଼ ଗାଡ଼ିରେ ଲୋକ ବହୁଦୂରରୁ ଆସିକି ଫିଲ୍ମଟିକୁ ଦେଖିକି ଯାଇଛନ୍ତି ।
ପ୍ରଥମ ଥର ପାଇଁ ପୁଣି କୋଭିଡରେ ଗୋଟିଏ ଫିଲ୍ମର ନିର୍ଦ୍ଧେଶନା ଦେଲେ କଣ ପାଇଁ?
ଉ- ଇଚ୍ଛା ହେଲା କିଛି ନୂଆ କରିବାକୁ, କାରଣ “କରୋନା ମହାମାରୀ ସମୟରେ ସବୁ କଳାକାରଙ୍କ ପାଖରେ କିଛି କାମ ନଥିଲା ବେସାହାରା ହୋଇ ବସିଥିଲେ । ସେହି ସମୟରେ ମୁଁ ଏବଂ ମୋ ସହ ମୋର କିଛି ସହଯୋଗୀ ଭାବିଥିଲୁ କି କଳାକାରଙ୍କୁ କେମିତି କାମ ମିଳି ପାରିବ । ତେଣୁ ଆମେ “ଭାବେ ସିନା କହିପାରେନା” ଭଳି ଗୋଟିଏ ଫିଲ୍ମ ତିଆରି କରିଥିଲୁ ଏବଂ ଏହି ଫିଲ୍ମର ସୁଟିଂ ଆମେ ଇଣ୍ଡୋର୍ରେ କରିଥିଲୁ” । ପୂର୍ବରୁ ମୁଁ ଅଭିନେତା ଥିଲି ପରେ ପ୍ରଯୋଜକ ହେଲି ଆଉ ମୋର ଏହି ଫିଲ୍ମ ଦ୍ୱାରା ମୁଁ ନିର୍ଦ୍ଧେଶକ ମଧ୍ୟ ହୋଇଗଲି ।ଏହା ବ୍ୟତୀତ ମୁଁ ଅଭିନୟକୁ କେବେ ଛାଡ଼ିପାରିବି ନାହିଁ । ପ୍ରଯୋଜନା ନିର୍ଦ୍ଧେଶନା, ଅଭିନୟ ସବୁ ସେମିତି ଚାଲିବ ଯେମିତି ଆଗରୁ ଚାଲୁଥିଲା ।
ଆମର ଏହି ଆଲୋଚନା ରେ ଆପଣଙ୍କୁ କଣ ଅନୁଭବ ହେଲା ନିଶ୍ଚୟ ଆମକୁ କମେଣ୍ଟରେ ନିଜର ମତାମତ ଜଣାନ୍ତୁ । ଆପଣଙ୍କ ମତାମତ ଆମ ପାଇଁ ଜରୁରୀ।
