ମାନସିକ ଚାପ ର କଣ ରହିଛି କାରଣ ? ଜାଣନ୍ତୁ ସୁଖ ଏବଂ ଶାନ୍ତିରେ ଜୀବନ ଯାପନ କରିବାର ରହସ୍ୟ !

ଆଜିକାଲି ପ୍ରାୟ ସମସ୍ତଙ୍କ ମୁହଁରେ ଆପଣ ଷ୍ଟ୍ରେସ୍ ଶବ୍ଦଟି ଶୁଣିଥିବେ । ସ୍କୁଲ ଯାଉଥିବା ପିଲା ହେଉ କିମ୍ବା ବୟଷ୍କ ବ୍ୟକ୍ତି , ପ୍ରାୟ ସମସ୍ତେ କହନ୍ତି ଓହ…କି ଷ୍ଟ୍ରେସ୍ । ତେବେ ଷ୍ଟ୍ରେସ୍ ଶବ୍ଦର ଅର୍ଥ ହେଉଛି ଚାପ । ବର୍ତ୍ତମାନ ସମୟରେ ସମସ୍ତଙ୍କର ଧାଁ ଧପଡ଼ ଭରା ଜୀବନ । କାରଣ ବର୍ତ୍ତମାନ ସମସ୍ତଙ୍କର ପ୍ରତିଯୋଗିତା ହେଉଛି ପ୍ରଥମ ପ୍ରାଥମିକତା । ସ୍କୁଲରେ ଟପର୍ ହେବା କିମ୍ବା ୯୦ % ପତିଶତ ନମ୍ବର ଆଣିବା ପାଇଁ କିଛି ପିଲାଙ୍କର ଇଚ୍ଛା ଥାଏ ଏବଂ ଅନ୍ୟ ପିଲାମାନଙ୍କୁ ଅବିଭାବକ ମାନେ ଚାପ ପକାଇଥାନ୍ତି । ତେଣୁ ସ୍କୁଲ ଗୁଡିକରେ ଏକ ପ୍ରକାର ର ପ୍ରତିଯୋଗିତାର ପରିବେଶ ସୃଷ୍ଟି ହୁଏ । ବଡ଼ ବଡ଼ ବ୍ୟାଗ୍ ରେ ବଡ଼ ବଡ଼ ବହି ସବୁ ଧରି ସ୍କୁଲ୍ କୁ ଯାଇଥାନ୍ତି ପିଲା ମାନେ । ପରୀକ୍ଷା ପୂର୍ବରୁ ପ୍ରସ୍ତୁତି ସମୟରେ ବଢେ ମାନସିକ ଚାପ ଏବଂ ପରୀକ୍ଷାରେ ଆଶା ଅନୁଯାୟୀ ନମ୍ବର ନ ଆସିଲେ ମଧ୍ୟ ମାନସିକ ଚାପ ଦ୍ୱିଗୁଣିତ ହୋଇଯାଏ । ଗୋଟିଏ ପଟେ ଦେଖିବାକୁ ଗଲେ ମାନସିକ ଚାପର ଅନ୍ୟ ନାମ ବା ଇଁରାଜୀ ନାମ ହେଉଛି ଷ୍ଟ୍ରେସ୍ । ଦେଖିବାକୁ ଗଲେ ଷ୍ଟ୍ରେସ୍ ଗୋଟିଏ ଫ୍ୟାସନେବଲ୍ ନାଁ । କାରଣ ଆଧୁନିକ ସମାଜରେ ଏହି ଶବ୍ଦଟିକୁ ଅନେକ ବ୍ୟବହାର କରନ୍ତି । କିଏ ଏହାକୁ ବ୍ୟକ୍ତିଗତ ସ୍ତରରେ ବ୍ୟବହାର କରେ ତ ପୁଣି କିଏ ବୃତ୍ତିଗତ ସ୍ତରରେ ଏହାର ବ୍ୟବହାର କରିଥାଏ । ମାନସିକ ଚାପ ଆମ ଦୈନନ୍ଦିନ ଜୀବନର ଏକ ଅଂଶବିଶେଷ ଭାବେ ଯୋଡି ହୋଇଯାଇଛି । 

 

• ତେବେ ଷ୍ଟ୍ରେସ୍ ବଢିବାର ପ୍ରକୃତ କାରଣ କଣ ?
• ଏହାକୁ ଦୂର କରାଯାଇପାରିବ କି ନାହିଁ ? 
• ଆପଣ କିପରି ଚିନ୍ତାମୁକ୍ତ ଜୀବନ ଅତିବାହିତ କରିପାରିବେ ? 
• ସୁଖ ଏବଂ ଶାନ୍ତିରେ ଜୀବନ ଯାପନ କରିବାର ରହସ୍ୟ ?

 

ଏହି ଆର୍ଟିକିଲ୍ ଟିକୁ ଶେଷଯାଏ ପଢନ୍ତୁ , ଜାଣନ୍ତୁ ସୁଖ ଏବଂ ଶାନ୍ତିରେ ବଞ୍ଚିବାର ରହସ୍ୟ ।

 

• ଷ୍ଟ୍ରେସ୍ ବଢିବାର ପ୍ରକୃତ କାରଣ କଣ ?

ଷ୍ଟ୍ରେସ୍ ବଢିବାର ମୂଳ କାରଣ ହେଲା ଚିନ୍ତା । ସବୁ ଚିନ୍ତା ଷ୍ଟ୍ରେସ୍ ର କାରଣ ହୋଇନପାରେ । କେବଳ ନକାରାତ୍ମକ ଚିନ୍ତା ହିଁ  ଷ୍ଟ୍ରେସ୍ ବା ମାନସିକ ଚାପର ମୁଖ୍ୟ କାରଣ । କାର୍ଯ୍ୟରେ ଅସଫଳ ହେବା କିମ୍ବା ଭବିଷ୍ୟତକୁ ନେଇ ଅତ୍ୟଧିକ ଚିନ୍ତା କରିବା ଏହାର ମୁଖ୍ୟ କାରଣ । ତେବେ ଆବଶ୍ୟକତା ଠାରୁ ଅଧିକ ଚିନ୍ତା ଶରୀର ପାଇଁ କ୍ଷତିକାରକ । ମାନସିକ ଚିନ୍ତା ଆପଣଙ୍କର ବ୍ଲଡ୍ ପ୍ରେସରକୁ ମଧ୍ୟ ପ୍ରଭାବିତ କରିପାରେ । ତେଣୁ ଏହା ଶରୀର ପାଇଁ କ୍ଷତି କାରକ । ଷ୍ଟ୍ରେସ୍ ରିଲିଫ୍ ବା ଚିନ୍ତାରୁ ମୁକ୍ତି ପାଇଁ ଅନେକ ଲୋକ ମଦ୍ୟପାନ ତଥା ନିଶା ଦ୍ରବ୍ୟର ସେବନ କରିଥାନ୍ତି । ଏହା ଅଳ୍ପ ସମୟପାଇଁ ଚିନ୍ତାରୁ ମୁକ୍ତି ଦେଇଥାଏ । କିନ୍ତୁ ଭବିଷ୍ୟତରେ ଏହାର କୁପରିଣାମ ଦେଖିବାକୁ ମିଳିଥାଏ । ମାଦକ ଦ୍ରବ୍ୟ ସେବନର ପରିଣାମ ଖୁବ୍ ଭୟଙ୍କର ହୋଇଥାଏ । ଷ୍ଟ୍ରେସ୍ ବଢିବାର ଅନ୍ୟଏକ କାରଣ ହେଉଛି ଆଶା । ବୃତ୍ତିଗତ ଜୀବନ କିମ୍ବା ବ୍ୟକ୍ତିଗତ ଜୀବନ ରୁ ଅତ୍ୟଧିକ ଆଶା କରିବା ଏବଂ ଆଶା ଠାରୁ ବିପରୀତ ଘଟିବା ଷ୍ଟ୍ରେସ୍ ବଢିବାର ମୁଖ୍ୟକାରଣ । 

ଆଜି ଆପଣଙ୍କୁ ଯାହା ସଫଳତା ଲାଗୁଛି , ତାହା ଭବିଷ୍ୟତରେ ଆବଶ୍ୟକ ମଧ୍ୟ ପଡି ନପାରେ । ବୟସ ବଢିବା ସଂଙ୍ଗେ ସଂଙ୍ଗେ ସଫଳତାର ସଂଜ୍ଞା ମଧ୍ୟ ବଦଳି ଯାଇଥାଏ । ଛୋଟ ବେଳେ ଗୋଟିଏ ସାଇକେଲ୍ ଏବଂ ଦଶମ ଶ୍ରେଣୀ ପରୀକ୍ଷାରେ ଭଲ ମାର୍କର ଆବଶ୍ୟକତା ପଡିଥାଏ । ଯୁବା ଅବସ୍ଥାରେ  +୨ କିମ୍ବା +୩ ରେ ଭଲ କ୍ୟାରିୟର ଏବଂ ଭଲ ଜୀବନସାଥୀଟିଏ ଲୋଡା ପଡିଥାଏ । ଯୁବାବସ୍ଥାରେ କିଏ କ୍ୟାରିୟରକୁ ନେଇ ସବୁବେଳେ ଚିନ୍ତାରେ ଥାଏ । ପୁଣି କିଏ ବ୍ୟକ୍ତିଗତ ଜୀବନରେ ପ୍ରେମର ସଂମ୍ପର୍କ ପାଇଁ ଚିନ୍ତାର ସମୁଦ୍ରରେ ବୁଡି ରହିଥାଏ । ପ୍ରେମ ଏକପାଖିଆ ବା ଓ୍ୱାନ୍ ସାଇଡେଡ୍ ଲଭ ହୋଇପାରେ । କିଏ ନିଜର ଜୀବନସାଥୀର ବିଶ୍ୱାସଯୋଗ୍ୟତା ଉପରେ ମନରେ ସନ୍ଧେହ ସୃଷ୍ଟି କରିଥାଏ । ପୁଣି କିଏ ହୃଦୟ ଭିତରେ ଗୋପନୀୟ ଢଙ୍ଗରେ ସାଇତି ରଖିଥିବା ମନର ମଣିଷ କାଳେ ଆଉ କାହାର ହେଇଯିବ ସେଥିପାଇଁ ଚିନ୍ତାର ପ୍ରାଚୀର ମଧ୍ୟରେ ନିଜକୁ ବାନ୍ଧିରଖିଥାଏ । ବର୍ତ୍ତମାନ ସମୟରେ ଲଭ୍ , ରିଲେସନ୍ ସିପ୍ ଏବଂ ବ୍ରେକ୍ ଅପ୍ କୁ ନେଇ ଅନେକ ଯୁବକ ଯୁବତୀ ନିଜେ ନିଜକୁ ଚିନ୍ତାର ସମୁଦ୍ରରେ ବୁଡାଇ ରଖୁଛନ୍ତି । ଅନେକ ମେଧାବୀ ଛାତ୍ରଛାତ୍ରୀ ଗୋଟିଏ ଅସଫଳତାକୁ ସହ୍ୟ କରିନପାରି ଆତ୍ମହତ୍ୟା ପରି ଚରମ ପଦକ୍ଷେପ ନେଉଛନ୍ତି । ବେସରକାରୀ ଚାକିରୀ କରୁଥିବା କର୍ମଚାରୀ ଛୁଟି , ଓ୍ୱାର୍କ ଲୋଡ୍ ଏବଂ ଅଫିସ୍ ରାଜନୀତି ପାଇଁ ଚିନ୍ତାରେ ରହୁଛନ୍ତି । ସରକାରୀ ଚାକିରୀ କରି ମଧ୍ୟ ଅନେକ ନିଜ ବ୍ୟକ୍ତିଗତ ଜୀବନରେ ସନ୍ତୁଷ୍ଟ ନୁହଁନ୍ତି । କିଏ ନିଜ ପରିବାର ପାଇଁ ଚିନ୍ତାରେ ତ ପୁଣି କିଏ ସ୍ୱାସ୍ଥ୍ୟ ଜନିତ ସମସ୍ୟା ପାଇଁ ଚିନ୍ତାରେ ରହୁଛି । କିଏ ଲୋନ୍ ବା ଋଣ ନେଇ ରାତିରେ ଶୋଇପାରୁ ନାହିଁ । 

 

• ଏହାକୁ ଦୂର କରାଯାଇପାରିବ କି ନାହିଁ ? 

ଷ୍ଟ୍ରେସ୍ ଏକ ରୋଗ ନୁହଁ । ଏହା ଏକ ପ୍ରକାରର ମାନସିକତା । କାରଣ କର୍ମମୟ ଜୀବନ ହେଉ କିମ୍ବା ବ୍ୟକ୍ତିଗତ ଜୀବନ , ଜୀବନରେ ଚିନ୍ତା ଲାଗି ରହିବ । କିନ୍ତୁ ଅତ୍ୟଧିକ ଚିନ୍ତା କରିବା ବା ଓଭର ଥିକିଙ୍କ୍ କରିବା ଜମାରୁବି ଠିକ୍ ନୁହଁ । ଚିନ୍ତା କରିବା ବଦଳରେ ଆବଶ୍ୟକ ମୁତାବକ କର୍ମକରିବା ଉଚିତ୍ । କାରଣ ଆପଣଙ୍କ ହାତରେ କେବଳ କର୍ମ କରିବାର ଅଧିକାର ଅଛି । ଫଳ ପାଇବାର ଅଧିକାର ବା କ୍ଷମତା ଆପଣଙ୍କ ହାତରେ ନାହିଁ । କର୍ମର ଫଳ ଦେବା ଦାଇତ୍ୱ ଇଶ୍ୱରୀୟ ଶକ୍ତି ଉପରେ ନିର୍ଭର କରେ । ଆପଣ ଯେକୌଣସି ଧର୍ମର ହୁଅନ୍ତୁ ନା କାହିଁକି ଆପଣଙ୍କ ର ଇଷ୍ଟ ଉପରେ ଭରଷା ଏବଂ ବିଶ୍ୱାସ ରହିବା ନିହାତି ଦରକାର । ଏହା ଦ୍ୱାରା କର୍ମକରିବା ସମୟରେ ମନ ବିଚଳିତ ହୋଇନଥାଏ । ଯେଉଁଥିପାଇଁକି ଆପଣଙ୍କ କର୍ମ ଠିକ୍ ଭାବରେ ହୋଇଥାଏ । ବର୍ତ୍ତମାନ ର କର୍ମ ଭବିଷ୍ୟତରେ ଫଳ ହୋଇ ଆସିବ । ତେଣୁ ଭଲ କର୍ମ କରିବା ଉଚିତ୍ । ସଫଳତା ଏପରି ଏକ ଶବ୍ଦ , ଯେଉଁଥିରେ ଅନେକ ଗୁଡିଏ ପାହାଚ ରହିଛି । ସେଥିମଧ୍ୟରୁ ବିଫଳତା ମଧ୍ୟ ଗୋଟିଏ ପାହାଚ ବୋଲି ସ୍ୱୀକାର କରିବାକୁ ପଡ଼ିବ । ମହାଭାରତ ପରି ଧର୍ମ ଗ୍ରନ୍ଥରେ ମଧ୍ୟ ପ୍ରଭୁ ଶ୍ରୀ କୃଷ୍ଣ କହିଛନ୍ତି – “ଯିଏ ଗୋଟିଏ ବିଫଳତାରେ ଭାଙ୍ଗିନଯାଇ , କର୍ମର ଫଳ ଉପରେ ଆଶା ନରଖି ପ୍ରୟାସ ଜାରିରଖିବ । ସେହି ବ୍ୟକ୍ତି ବାରମ୍ବାର ଜୀବନରେ ସଫଳ ହେବ । ସଫଳତାକୁ ନେଇ ଅହଂକାର କିମ୍ବା ଗର୍ବ କରିବା ଅନୁଚିତ୍ । କାରଣ ସଫଳତା ହେଉ କିମ୍ବା ବିଫଳତା , ସବୁକିଛି କ୍ଷଣ ସ୍ଥାୟୀ ।”

 

• ଆପଣ କିପରି ଚିନ୍ତାମୁକ୍ତ ଜୀବନ ଅତିବାହିତ କରିପାରିବେ ? 

ଚିନ୍ତାମୁକ୍ତ ଶବ୍ଦରେ ଦୁଇଟି ଶବ୍ଦ ଅଛି । ଗୋଟିଏ ଶବ୍ଦ ହେଲା ଚିନ୍ତା ଏବଂ ଅନ୍ୟ ଶବ୍ଦଟି ହେଲା ମୁକ୍ତ । ଚିନ୍ତାରୁ ମୁକ୍ତ ହେଲେ ହିଁ ଆପଣ ଚିନ୍ତାମୁକ୍ତ ଜୀବନ ଅତିବାହିତ କରିପାରିବେ । ରକେଟ୍ ଯେତେବେଳେ ଆଗକୁ ବଢେ ସେତେବେଳେ ରକେଟ୍ ନିଜର ଓଜନ କମାଇବା ପାଇଁ  ଅନାବଶ୍ୟକ ବୁଷ୍ଟର ଇଞ୍ଜିନଗୁଡିକ ଠାରୁ ନିଜକୁ ଅଲଗା କରିଥାଏ । କାରଣ ମହାକାଶକୁ ପ୍ରବେଶ କରିବା ପାଇଁ ପୃଥିବୀର ମାଧ୍ୟାକର୍ଷଣ ବଳକୁ ପରାସ୍ତ କରିବା  ସହଜ କଥାନୁହଁ । ବାୟୁମଣ୍ଡଳର ବିଭିନ୍ନ ସ୍ତର ଅନୁସାରେ ଜଳି ସରିଥିବା ରକେଟ୍ ବୁଷ୍ଟର ଗୁଡିକର ରକେଟ୍ ସହ ଯୋଡ଼ି ହୋଇ ରହିଲେ ତାହା ରକେଟ୍ ର ଓଜନ ବଢ଼ାଇବ ଏବଂ ରକେଟ୍ ଟି କେବେବି ତାର ଲକ୍ଷ୍ୟସ୍ଥଳରେ ପହଞ୍ଚି ପାରିବନି । ରକେଟ୍ ବୁଷ୍ଟର ଗୁଡିକ ରକେଟ୍ ଟିକୁ ବାୟୁମଣ୍ଡଳର କିଛି ଉଚ୍ଚତା ଯାଏଁ ନେଇ ଯାଇଥାନ୍ତି ଏବଂ ତାପରେ ରକେଟ୍ ର ଅନ୍ୟ ଇଞ୍ଜିନ୍ ଗୁଡିକ କାର୍ଯ୍ୟକ୍ଷମ ହୋଇଥାଏ । ସେତେବେଳେ ଜଳିଯାଇଥିବା ରକେଟ୍ ବୁଷ୍ଟର ଗୁଡିକ ର ଆନାବଶ୍ୟକ ଭାର ହୋଇ ରକେଟ୍ ରେ ଯୋଡି ହୋଇରହିଥାଏ । ତେଣୁ ତାକୁ ଅଲଗା କରିବା ନିହାତି ଆବଶ୍ୟକ । କହିବାର ତାତ୍ପର୍ଯ୍ୟ ଏହା ଯେ ସବୁ ଜିନିଷର ଆବଶ୍ୟକତା ସମୟ ଅନୁସାରେ ବଦଳିଥାଏ । ଏଦୁନିଆରେ କୌଣସି ବି ଜିନିଷ ଅନାବଶ୍ୟକ ନୁହଁ । ତେଣୁ ଆବଶ୍ୟକତା ଠାରୁ ଅଧିକ ଗୁରୁତ୍ୱ ଦେଲେ କିମ୍ବା ଅତୀତର ଚିନ୍ତାରେ ମଗ୍ନ ରହିଲେ ଭବିଷ୍ୟତ ଉଜ୍ୱଳ ହେବ କିପରି ? ଚିନ୍ତାରୁ ମୁକ୍ତ ହୋଇ କର୍ମକଲେ ସଫଳହେବାର ଅଧିକ ଚାନ୍ସ ଥାଏ । ତେଣୁ ସୁଯୋଗ ହାତ ଛଡା କରନ୍ତୁ ନାହିଁ ଏବଂ ଧର୍ଯ୍ୟରଖି କର୍ମ କରନ୍ତୁ । ଆପଣ ଚିନ୍ତା କଲେ ମଧ୍ୟ ସୃଷ୍ଟି ର କୌଣସି ଜିନିଷ ବଦଳିଯିବ ନାହିଁ । କେବଳ ଆପଣ ନିଜକୁ ହିଁ ପରିବର୍ତ୍ତନ କରିପାରିବେ । ନିଜକୁ ପରିବର୍ତ୍ତନ କଲେ ଆବଶ୍ୟକତା ଅନୁସାରେ ଉଚିତ୍ କର୍ମ କରିପାରିବେ ।

 

• ସୁଖ  ଏବଂ  ଶାନ୍ତିରେ ଜୀବନ ଯାପନ କରିବାର ରହସ୍ୟ ?

ପ୍ରତ୍ୟେକ ବ୍ୟକ୍ତି ବିଶେଷ ଭିନ୍ନ ଭିନ୍ନ । ତେଣୁ ପ୍ରତ୍ୟେକ ମହିଳା ଏବଂ ପୁରୁଷର ଜୀବନଶୈଳୀ ଭିନ୍ନ ଭିନ୍ନ । ଜୀବନଶୈଳୀ ଅନୁସାରେ ସୁବିଧା ଏବଂ ଅସୁବିଧା ମଧ୍ୟ ଭିନ୍ନ ଭିନ୍ନ । ପ୍ରଥମେ ସ୍ୱାସ୍ଥ୍ୟ ଉପରେ ଧ୍ୟାନ ଦିଅନ୍ତୁ । ଆପଣ ଯେତିକି ଫିଟ୍ ରହିବେ ସେତିକି ଆପଣ ଖୁସିରେ ରହିବେ । ସ୍ୱାସ୍ଥ୍ୟ ପ୍ରତ୍ୟେକ୍ଷ ଭାବରେ ହେଉ କିମ୍ବା ପରୋକ୍ଷ ଭାବରେ ମସ୍ତିଷ୍କକୁ ପ୍ରଭାବିତ କରିଥାଏ । ମସ୍ତିଷ୍କ ସୁସ୍ଥ ରହିଲେ ଚିନ୍ତାଧାରାରେ ପରିବର୍ତ୍ତନ ଆସିବା ସହ ମନ ମଧ୍ୟ ଭଲରହିବ । ସ୍ୱାସ୍ଥ୍ୟ ପରେ ନିଜର ଅର୍ଥନୈତିକ ଅବସ୍ଥା ଉପରେ ଗୁରୁତ୍ୱ ଦିଅନ୍ତୁ । ମୌଳିକ ଆବଶ୍ୟକତା ପୂର୍ଣ୍ଣ ହେଲାପରେ ଆପଣ କ୍ୟାରିୟରରେ ରିସ୍କ୍ ନେଇପାରିବେ । ବ୍ୟବସାୟ କରନ୍ତୁ କିମ୍ବା ଚାକିରୀ , ଅସୁବିଧା ଏବଂ ସୁବିଧା ଉଭୟ ଆସିବ । ସେଥିପ୍ରତି ଧ୍ୟାନ ଦେଇ କର୍ମକରିବାରେ ଅସୁବିଧା ନାହିଁ । ଗୋଟିଏ ରାତିରେ କୋଟିପତି ହେବା ଆଶାରେ ଋଣ ନେଇ ଅଯଥା ଇନଭେଷ୍ଟ କରନ୍ତୁ ନାହିଁ । ଲକ୍ଷ୍ୟ ନିର୍ଧାରଣ କରି କାର୍ଯ୍ୟ କରନ୍ତୁ । ଏହା ଦ୍ୱାରା ଆପଣ ଆପଣଙ୍କ ଜୀବନର ଲକ୍ଷ୍ୟ ପ୍ରାପ୍ତି ହେବାର ସମ୍ଭାବନା ଅଧିକ । ସବୁଠାରୁ ବଡ କଥା ଏବଂ ଗୁରୁତ୍ୱ ପୂର୍ଣ୍ଣ କଥା ହେଲା କାହାସହ ନିଜକୁ ତୁଳନା କରନ୍ତୁ ନାହିଁ । ନିଜକୁ ନିଜସହ ତୁଳନା କଲେ ହିଁ ନିଜ ଜୀବନରେ ଅଗ୍ରଗତି କରିବେ । ଆପଣ ଆଉ କାହାଠୁ ଅଧିକ ଟଙ୍କା ରୋଜଗାର କଲେ ତା ଠାରୁ ଭଲରେ ରହିବେ । ଏହି ଚିନ୍ତା ମନୁଷ୍ୟକୁ ଚିନ୍ତାମୁକ୍ତ କରିବା ବଦଳରେ ଚିନ୍ତାଯୁକ୍ତ କରିଥାଏ । ପରିବାର ତଥା ପ୍ରିୟଜନଙ୍କୁ ଆବଶ୍ୟକତା ଅନୁସାରେ ସମୟ ଦିଅନ୍ତୁ । ବୃତ୍ତିଗତ ସ୍ତରରେ ମଧ୍ୟ ଆବଶ୍ୟକତା ଠାରୁ ଅଧିକ ଗୁରୁତ୍ୱ ଦିଅନ୍ତୁ ନାହିଁ । କ୍ୟାରିୟର ଶବ୍ଦଟି ଅଳ୍ପ କିନ୍ତୁ ଏହାର ଆକାର ପ୍ରାୟ ସମୁଦ୍ରପରି । ତେଣୁ ଲୋଭ ଏବଂ ଲାଭ ମଣିଷକୁ ସର୍ବଦା ଚିନ୍ତାଯୁକ୍ତ କରିରଖିଥାଏ । ଅନେକ ଲୋକ ଏଥିପାଇଁ ରାତିରେ ଶୋଇପାରନ୍ତି ନାହିଁ । ଯାହା ଦ୍ୱାରା ଆୟୁଷ ମଧ୍ୟ କମ୍ ହୋଇଥାଏ । ଜୀବନର ମୂଲ୍ୟ ତୁଳନାରେ ଅନ୍ୟ ସବୁ ଜିନିଷର ମୂଲ୍ୟ ସବୁ ଫିକା । ଆପଣ ଯେକୌଣସି ଧର୍ମର ହୋଇଥିଲେ ମଧ୍ୟ ଇଶ୍ୱରୀୟଶକ୍ତି ଉପରେ ଭରଷା ରଖନ୍ତୁ । ସମସ୍ତଙ୍କ ସହ ନିଜକୁ ମଧ୍ୟ ଗୁରୁତ୍ୱ ଦିଅନ୍ତୁ । ଏହା ହେଉଛି ସୁଖ ଏବଂ ଶାନ୍ତିରେ ଜୀବନ ଯାପନ କରିବାର ମୂଳ ମନ୍ତ୍ର ।

 

 

 

 

Lifestyle-related ପ୍ରତ୍ୟେକଟି ତଥ୍ୟ ଜାଣିବା ପାଇଁ https://odiadaily.in/ website କୁ ପ୍ରତ୍ୟେକ ଦିନ Visit କରନ୍ତୁ ।